ISMAACIIL MIRE
Fardihii Daraawiish ee Jihaadkii gumaystaha jilbaha loogu dhigay iyo Gantaalaha wax iska caabinta ee Hamaas 101 ka dib.
Dunidan maanta waa casri, dagaalkuna wuxuu noqday sareynta dhinaca cirka{Air Superior}, Israel waxa lagu tirayey dalka bariga dhexe dhanka cirka ugu tudh tudha roon. Saasooy tahay marinka Qasa sahal iyo qiimo yar midna uguma kacin inay lug geliso.
Waxayna soo dhaafi la dahayday xuduud beenaadka siligyadda cabsida daraadeed ay ugu wareejisay ay xaga shishe ka tuban yihiin, baabuurtooda gaashaaman oo loogu yeedhay inay yihiin kuwa dunida ugu casrisan. Gantaalaha Xamaas ayaa ku hoobanaya inta badan deegaankasta oo ay leeyihiin, inkastoo nidaamka difaaca ee Iron Dome uu daadintooda ku hawlan yahay kuwa badan ayaa ka siibanaya dabadeedna jukeenaya magaalooyinkooda, Garoomadoodii ayaa laga wada yaacay, hawadii dalka ayaa xidhan oo saxar aan gantaal ahayn uusan dul marayn xataa shinbirihii ayaa kaymahooda ku negaadey si ay uga gambadaan weerar iyo celiska.
Soomaalidu boqol sano ka hor dagaalkan wey soo martay, saancadihii Ingiriiska iyo dadkii raaciyadda u ahaa ee ciidamadooda uu dunida oo dhan ka keenay waxa la dagaalamyey dad hubkoodu ahaa seef gacanta lagu qaato, Falaadho geedo laga sameeyo, iyo qoryo xabad kelyaalle ah oo ay ku furteen dagaaladii ay la galeen gumaystaha. Baabuurtooda gaashaaman waxay ahaayeen Fardaha, yuhuuntoodu waxay ahayd jihaad, niyadooduna waxay ahayd mid sareysa.
Dagaalkoodu wuxuu ahaa xoreyn iyo difaac, waxayna ka hortagayeen mabaadiidii masiixiyeynta dhulkii Soomaalida, ee hawlgaladii/ Missions kaniisadaha, aruurintii caruuraha iyo dhalan rogii dadka 100% Muslimka ahaa taariikh kale lagu sunti rabay.
Dhul xoreyntii iyo diin difaacideedii, ku dagaalamid marxalad adag, iyadoo gumaystuhu haystay nooc kasta oo huba, gadiid ah iyo ilaa dayuurado dagaal markii danbe uu miciin bidey kolkii uu ka adkaan waayey rag laba qayd xidhan oo iyagoo baraad la' isku soo maqiiqaya dabadeedba laba u kala jaraya askartooda.
Waxa xasuus leh gabaygii duullaankii Jeneraal Richard Corfeild lagu qaraajinayey, waa dagaalkii Ruugga/ Ina Dulmadoobe, uu mujaahid Ismaaciil Mirre kaga waramay qaabkii dagaalgelinta, habkii socod, Fardihii, ujeedadii iyo waxkasta oo maanta la odhan karo waa qorshe ciidan oo casri ah{ Modern Military Strategy}. Halka farduhu ugu jireen Daraawiish maalintaas, iyo halka maanta Xamaas gantaalaheedu ugu jiraan waa laba dad oo wakhtiyo kala duduwan la kulmay marxaladdo ad adag.
Gabaygii cajiibka ahaana waa kan...
Annagoo Taleex naal jihaad, taladi soo qaadnay
Toddobaatan boqol oo Darwiish, togatey neef doora
Sayidkeennu tii uu na yiri, Torog ku heensaynnay
Shakadaha intuu noo tebbedey, noogu tacab qaybi
Illaahay ha’ tabantaabiyee, ducada noo tuumi
Wareegada rag baa waxay tewali, yaan wax kaa tegine
Annana tawlka qaalmaha nin iyo, tulud u soo saarray
Sibraar caana geel loo tabcaday, talax ku sii maallay
Tiirkii Rasuulkiyo sharciga, toog ku wada fuullay
Galabtaa taxaabiyo kadlaba, toobiyaha raacnay
Habeenkii fardaha waw tudhnaye, taag ku sii mirannay
Tun biciida lagu qoofalyow, xamashka loo taabay
Talaaduhu markii ay dhaceen, talalay oo reemay
Tixda gabayga goortaan akhriyey, toose niman jiifay
Tiraabkaygu meeshuu ka baxay, la isku soo tuumi
Salaaddii markii aan tukannay, yaarka kaga taagnay
Togga Ulasameed dooyadii, horay u tuuryeynay
Intay timacad noo soo arkeen, marada noo taage
Annaguna jihaad kama tagnee, tiimbad ugu roorray
Sengeyaal tabaadiyo galool, weerarka u tooxnay
Tiiraanyo ololkii dhulkii, Taani naga qaaday
Tallaa’ayda qaylada Berbera, tahan la weydaari
Taambuuglayaashiyo kuway, tebeysey soo gaadhe
Teysaha gugii oo hanqadhay, tininigtii yeedhay
Talaxumada awrkuu u xidhay, baqe tarraarsiinnay
Gildhigaanka meeshuu turqaday, lagu tunsii geela
Tirsan mayno uunkii tirmiyo, tulushle Iiddoore
Gaaladu waxay tacab lahayd, taabnay galabtaase
Maadhiin turaabtaa ka badan, tuurta kaga qaadnay
Tukihii intaan niman u wadhay, tobanle soo qaatay
Gebagebo u tooxnoo Kufriga, maarre kaga teednay
Tafwareeman maynine intaan, tubay ku aanshaaday
Galabtaa carraabada ku nimid, turugga Buuhoodle
Habeenkaa ninkii tamar lahaa, tarantarree gaadhka
Habeen kale taxaashay Nugaal, Godan u tuuryeynay
Habeen kalena tuuraha Cadduur, toolin kaga maallay
Habeen kale Tagaabeeye iyo, tu’innay Hayllaawe
Habeenkanna Dariiqada tubnoo, toosan lagu qaybsay
Toban gool tabaadiga dhigiyo, toban unuun gooyo
Iyo toban tiftii hore rimoo, taani lagu qooqshey
Iyo toban abeer tawllahoo, tixinka qaalmooda
Iyo toban irmaanoo aniga, la igu taageeray
Iyo taan eryoon jirey markay, tubantehey joogto
Been laguma tookhiyo afaan, taabud noqoneyne
Intaa Xarunta waan tubay xaqaa, lagu tanaadaaye
Warka Tuurre waa laga hayaa, taniyo Iimey e
Waa Xamar tarraara oo misana, taab ku sii daraye
Taltallaabsigiisiyo kabtiga, tabo kolow dheere
Anigana tis bay galay intaan, col ugu taagnaaye
Tuludna uma godlaan reeruhuu, tawl ka saanyadaye
Tafantoofka gaalkuu u dilay, waa tix geliyaaye
Suldaan Ruumna loo tebi inuu, tuuladii gubaye
Tima soohanlow Eebbahay, kuma tabaaleeyo.
 |
| TALEEX |
GABAYGII KOOGIL EE DARAAWIISHTA
Gabayadi can baxay ee sayid Mohamed ka tiriyey
jabkii Ingiriiska waxaa ka mid aha dagaalkii Ruuga
(Dulmadoobe) o ahaa kii lagu dilay taliyihii cidamada
Ingiriiska Richard corfield, gaalkaas o Soomaalidu u
garan ogtahay koofil ahaana ninkii Sayidku ka tiriyey
gabaygii can ahaa ee Adaa koofilow jlitayoon. Waxaa
sidoo kale halkaas lagu laayey saraakiil badan o Ingiriis
ah. wuxuu yidhi
Adaa Koofilow jiitayoon, dunida joogeyne
Adigaa jidkii lagugu wadi, jimic la'aaneede
Jahannamo la geeyow haddaad, aakhirow jihato
Nimankii jannow kacay war bay, jirin inshaalleeye
Jameecooyinkii iyo haddaad, jawhartii aragto
Sida Eebbahey kuu jirrabay, mari jawaabteeda
Daraawiish jikaar naga ma deyn, tan iyo jeerkii dheh
Ingiriis jabyoo waxaa ku dhacay, jac iyo baaruud dheh
Waxay noo jajuubteenna waa, jibasha diinneed dheh
Jigta weerar bay goor barqo ah, nagu jiteeyeen dheh
Anigana Jikrey ila heleen shalay, jihaadkii dheh
Jeeniga hortiisey rasaas, igaga joojeen dheh
Jiiraayaday ila dhaceen, jilic afkoodii dheh
Siday kuugu jeexeen magliga, jararacdii sheego
Billaawuhu siduu kuu jarjaray, jeerarka u muuji
Naf jaclaysigii baan ku idhi, jaallow iga daa dheh
Jaljalleecadii baa wadnaha, jeeb ka soo ruqay dheh
Jeedaaladii baa indhuhu kor, ii jillaadmeen dheh
Jimic kagama helin tuugmadaan, jeriyey ruuxii dheh
Kolkaan juuq idhaahdaba afkay, iga jifeeyeen dheh
Dhaaxaan jalleecee dhagbaan, jalaq la ii siinin dheh
Goortaan jarreeraba gafoo, nolol ka jaan qaaday
Sida janannadii hore tashigu, igu jaguugnaa dheh
Taladii jinnigu ii hor maray, jaasadeed helay dheh
Jiidaha xanuunka leh markii, la igu jeeraarshay
Jibaadka iga soo baxay dadkii, jiifka qaban waa dheh
Kolkay rubaddu jow tidhi or bay, iga ag jiibsheen dheh
Jiidhkaygiina bahalbaa cunoo, jiitay hilibkii dheh
Jurmidiyo baruurtii dhurwaa, jugux ka siiyaa dheh
Jiljiladiyo seedaha tukay, igaga jaaseen dheh
haddaan lays jikraareyn tolkay, laga jidroonaa dheh
Weligood waxaa lagu jaraa, jilib-dhig duulaan dheh
Daraawiishi waa jibindhowgiyo, jowga soo bixi dheh.
